الشعب الجميل بتاعنا عنده مشكلة مع الحيوانات... مش بس العربجي اللي بيضرب الحمار علقة موت علشان يجر حمولته التسعة طن و يطلع المطلع... و لا بتاع الحنطور اللي حصانه واقف ١٢ ساعة او اكتر في الشمس مستني راكب او سايح ... و لا طنط فيفي اللي جابت الكلب البيكينواه اللذيذ الصغنون و اللي غربية اوي ابتدا يكبر و بقي دمه تقيل علي قلبها فسربته في الشارع و خصوصا ان صحبتها طنط زيزي الكلب بتاعه الشيواوا لسة صغنن و كيوت فمينفعشي يعني بصراحة... و لا الواد الغتت هيثم ابن سيادة اللواء اللي شبط في كلب وولف علشان بيحب الكلاب اوي (و هو اصلا عاوز كلب علشان يخوف به اصحابه)... سيادتش اللواء ربنا ياخ... يباركله قام جابله واحد من كلية الشرطة فرز تاني او تالت ... حاجة كدة... الكلاب اللي متنفعش في الشرطة يعني ... ساعات بتبقي كلاب لعبية أو غبية او طيبة بزيادة و عازة تدلع و بس... الواد هيثم ابن الك... سادة اللوا معجبوش ان الكلب طيب و مش شرس و مش بيخوف العيال اصحابه... فقام فتحله باب البيت و خلاه يخرج (قال ايه هرب - قضاء و قدر يعني - الواد متعلم من ابوه لعبة القضاء و القدر دي)... و مش حاتكلم عن العيال اللي بتحدف كلاب الشارع بالطوب و لا اللي بيدوسهم عن قصد بعربيته و لا الحكومة اللي بتحط انواع سموم ممنوعة دوليا للتخلص من كلاب الشوارع و مش حاتكلم عن الناس ولاد التيت اللي لو شافوا او سمعوا حد بيدافع عن الحيوانات لازم يرموا كلمة: بدل ما انتم محموقين اوي كدة عالحيوانات مش البني ادمين اولي. (دول مفيش رد محترم ينفع معاهم - و انا مؤدب)
المهم بالرغم من بشاعة تعاملنا مع الحيوانات بس ميمنعش ان في ناس كتير لها الجنة و بتحن علي الحيوانات الضعيفة دي و توكلها و تاخدها بيوتها و علاجات و كدة يعني... بس موضوعنا النهاردة هو علاقتنا مع الحيوانات من ناحية تانية خااالص (مش الناحية اللي جت في بالك يا متخلف منك له)
ندخل في الناحية المقصودة:
تعاملنا مع انواع الحيوانات و انواع البشر و ازاي بندخل الاتنين في بعض... مثلا
لما نيجي نشتم حد شتيمة عامة - يعني شغالة لأي سبب بنقوله: ىا أبن الكلب / ده أبن ستين كلب
لما نشتم حد مش طايقينه بنقوله: ده أبن لبوة (لان المرأة اللي بتتدلع / المنحرفة في نظر المجتمع الكيوت بتاعنا بنقول عليها لبوة - زوجة الاسد لا مؤاخذة)
لما نشتم حد لغباوته: انت يا حمار / يا جحش / يا بغل
لما نشتم حد لتهوره: دخل زي التور / بشويش يا تور
لما نشتم حد لهدوئه (معرفش بنشتمه ليه علي الهدوء): قاعد ساكت زي التيس / قاعد متيس ليه؟
لما نشتم حد لاغي عقله و مش بيفكر: ده خروف / ماشين وراه زي الخرفان
لما نشتم حد من غير ما نشتم حد: (بالمستغطي يعني) القرد في عين امه غزال
و مش الشتيمة بس ... لا... لما كمان نوصف حد... مثلا
لما نوصف ذكاء حد (لا شتيمة و لا مدح): ده تعلب / بيدحلب زي التعلب (كل واحد يفهمها براحته)
لما نوصف حد لئيم: ده تعبان لدغته و القبر
لما نوصف واحدة طويلة: دي رقبتها لوحدها زي الزرافة
لما نوصف واحد او واحدة تخينة: ده عامل زي العجل / دي تخينة عجلة / تخين فيل/فيلة
لما نوصف حد شقي: ده شقي زي القرد / شقاوة قرود
لما نوصف حد جسمه او جسمها مرن: عامل/عاملة زي العرسة تعدي من تحت عقب الباب
لما نوصف حد صوته رفيع: صوته مسرسع زي العرسة
لما نوصف حد زنان: واضحة دي > انت زنان زي الدبانة
لما نوصف حد ذاكرته ضعيفة: ده انت ذاكرتك ذاكرة سمكة
لما نوصف حد ذاكرته جامدة: ده انت ذاكرتك ذاكرة فيل
لما نوصف حد بيخاف/خواف: متبقاش زي الفار خواف كدة
لما نوصف حد رفيع خارج من البحر: عامل زي الفار المبلول
لما نوصف حد نظره كويس: عينه ايه... صقر
لما نوصف شجاعة حد بنقوله: ده انت أسد / غضنفر
لما نوصف قدرة تحمل حد: ده انت جمل / حمول زي الجمل
لما نوصف قدرة تحمل حد: ده انت جمل / حمول زي الجمل
لما نوصف واحدة بتخلف كتير: دي ارنبة
لما نوصف واحدة حلوة: دي مقطقطة (جاية من قطة؟؟؟)
لما نوصف حد شغيل و بيدي الشغل حقه: ده حمار شغل (من الاخر كدة هو غبي زي الحمار بس شغيل لأنه حمار!!!!!!)
توقيع:
