فعلا زمن السرعة ... زمان لما كنا بنقول التاريخ يعيد نفسه كان المقصود ان الاحداث اللي حصلت زمااااااان بتتكرر دلوقت... صح؟ (طبعا صح... اصل انا زي لواءا الجيش عارف و فاهم كل حاجة و مستحيل اكون غلطان) ما علينا نرجع لموضوعنا... التطور اللي حاصل من انترنت و فيسبوك (عدو الحكام العرب) خللي كل حاجة بتحصل بسرعة و التاريخ مبقاش زمااااااان لَا التاريخ اللي اقصده هنا و اللي بيعيد نفسه ده تاريخ قريب جدا من ٦ اشهر كده.... المثال ده خير دليل: في يناير خرجت الجماهير العريضة و الكنزة و الطويلة و القصيرة... كل الشعب يعني تطالب بإسقاط النظام و خلع مبارك (خللي سوزان تندم علي قانون الخلع بتاعها) المهم... وقتها خرج العلوج (زي في العراق) ... علوج الحكومة و اتهموا الشعب بايه؟ ايوة، صح....
- العمالة
- الخيانة
- التخريب
- اجندات اجنبية
- تدريب في الخارج علي الثورة
- و طبعا الكنتاكي .... هم يا جمل...
و كل ده علشان الشعب نادي بإسقاط النظام و خلع مبارك... ده التاريخ القريب و اللي أعاد نفسه الاسبوع ده (زمن السرعة مش قلتلك).... اليومين دول الناس طالبت بايه؟؟؟ يسقط المشير.... صح؟ و ايه كمان ان المجلس العسكري يا يتحرك و ينفذ مطالب الثورة يا يتحرك و يخلع و يبقي في مجلس رئاسي (مطالب من اول الثورة و لم تنفذ - دي ممكن نقول عليها مطالب قديمة ... شوفتوا زمن السرعة) ما علينا الناس جابت سيرة المشير... يا نهار اسود... الناس تجاوزت الخطوط الحمراء يا نهار كوبية (الكوبية دي كانت أقلام زي الأقلام الرصاص خطها زي البنفسجي كده - اصل انا اعرف كل حاجة... لواء بقي) ما علينا... سيرة المشير و يمشي كمان لا بقي دي الناس اللي بتقول الكلام ده أكيد: (الأدلة موجودة و موثقة... يا فتق)
- عملاء
- خونة
- مخربين
- اجندات اجنبية
- تدريب في الخارج علي الثورة
فاضل ايه؟
ايوة ... الكنتاكي و هم يا جمل...
مش باقولك عصر السرعة و التاريخ القريب بيعيد نفسه.....
توقيع:
المهلوس
- Posted using BlogPress from my iPhone